АКАФИСТ О УПОКОЕНИИ УСОПШИХ
Кондак 1
Непостижимым Промыслом ко благу вечному мир уготовляяй, человеком
времена и образ кончины определивый, остави, Господи, от века умершим
вся согрешения их, приими я во обители света и радования, объятия Отча
отверсти им потщися и услыши ны, память их совершающия и поющия:
Господи, Любы Неизреченная, помяни усопшия рабы Твоя.
Икос 1
Адама падшаго и весь род человеческий от вечныя погибели спасаяй,
послал еси, Блаже, в мир Сына Твоего, крестом бо и воскресением Его
возсия и нам живот вечнующий. На безмерное Твое милосердие уповающе,
чаем нетленнаго Царствия славы Твоея, усопшим даровати того просим, и
молим Ти ся:
Возвесели, Господи, души, житейскими бурями
истомленныя, да скорби и воздыхания земныя забвению предадят. Услыши я,
Господи, на лоне Твоем, яко же мать чада своя, и реки им: «Прощаются
вам греси ваша». Приими я, Господи, во блаженное и тихое пристанище
Твое, да возрадуются о Божественней славе Твоей.
Господи, Любы Неизреченная, помяни усопшия рабы Твоя.
Кондак 2
Озарением Всевышняго просвещаем, преподобный Макарий глас от черепа
услыша: «Егда молитеся о страждущих во аде, отрада бывает язычником».
О, дивныя силы молитв христианских, имиже преисподняя озаряется!
Неверныя купно и верныя утешение приемлют, егда о всем мире вопием:
Аллилуиа.
Икос 2
Рече некогда
Исаак Сириянин: «Сердце милующее о людех и скотех и о твари всей
молитвы слезныя ежечасно приносит, дабы сохранилися и очистилися».
Такожде и мы вси дерзновенно всем от века умершим у Господа помощи
просяще, взываем:
Низпосли нам, Господи, дар молитвы пламенеющей
о умерших. Помяни, Господи, вся заповедавшия нам, недостойным, молитися
о них и изжени забвенныя ими грехи. Помяни, Господи, вся, без молитвы
погребенныя, приими, Господи, в селения Твоя вся, от скорби или радости
смертию напрасною скончавшияся.
Господи, Любы Неизреченная, помяни усопшия рабы Твоя.
Кондак 3
Повинны есмы в бедствиих мира, в страдании безсловесныя твари, в
болезнех и муках младенцев непорочных, грехопадением бо людей
блаженство и лепота всея твари разрушься. О величайший из страдальцев
невинных, Христе Боже наш! Ты един греси отпустити всем можеши. Отпусти
же всем и вся, миру первозданное благоденствие подаждь, мертвии и живии
да обрящут, взывая: Аллилуиа.
Икос 3
Свете тихий, Искупителю всея вселенныя, любовию мир весь объемляй, се
слышится со Креста вопль Твой о вразех Твоих: «Отче, отпусти им!»
Именем всепрощения Твоего молитися Отцу Небесному о упокоении вечнем
Твоих и наших враг дерзаем:
Прости, Господи, кровь неповинную
пролившия, житейский путь наш скорбьми усеявшия, благоденствие свое
слезами ближних своих устроявшия. Не осуди, Господи, гонящия ны
клеветою и злобою. Милостию воздаждь, ихже обидехом или оскорбихом по
неведению, и да будет свята молитва наша о них таинством примирения.
Господи, Любы Неизреченная, помяни усопшия рабы Твоя.
Кондак 4
Спаси, Господи, в тяжких мучениих скончавшияся, убиенныя, живыми
погребенныя, землею засыпанныя, волнами и огнем поглощенныя, зверьми
растерзанныя, от глада, мраза, бури или падения с высоты умершия и
радость Твою вечную подаждь им за скорбь кончины. Да благословят
страданий своих время, яко искупления день, воспевая: Аллилуиа.
Икос 4
Всем, иже поемлеми суть могилой во светлой юности, иже на земли
терновый венец страданий прияша, иже радости земныя не узреша,
щедротами Твоея безконечныя любве воздаждь, Господи. Под тяжким
бременем трудов умершим воздаяние подаждь. Приими, Господи, в чертози
рая отроцы и девы и сподоби я ликовствования на вечери Сына Твоего.
Утиши, Господи, скорбь родителей о чадех умерших. Упокой, Господи, вся
рода и семени не имущия, о нихже несть кому молитву вознести Тебе,
Создателю, да исчезнут греси их от блистания всепрощения Твоего.
Господи, Любы Неизреченная, помяни усопшия рабы Твоя.
Кондак 5
Яко последнее ко вразумлению и покаянию знамение, смерть даровал еси,
Господи. При грозном блистании ея суета земная обнажается, страсти
плотския и страдания утихают, непокоривый разум смиряется. Правда
вечная отверзается, отягченнии же грехми и безбожницы на смертнем одре
бытие Твое вечное исповедуют и к милосердию Твоему взывают: Аллилуиа.
Икос 5
Отче утешения всяческаго, солнцем озаряеши, плодами услаждаеши, лепотою
мира друзи и врази Твоя веселиши. Веруем бо, яко и за гробом милосердие
Твое, даже всеми отверженныя грешникцы милующее, не истощавается.
Скорбим об ожесточенных и беззаконных хулителях Святыни Твоея. Буди,
Господи, над ними благая воля Твоя. Помилуй, аще возможно есть,
Господи, без покаяния скончавшияся, прости в омрачении ума сами себе
погубившия. Не постави нам в грех молитвы сей, но да будет святая воля
Твоя.
Господи, Любы Неизреченная, помяни усопшия рабы Твоя.
Кондак 6
Страшен есть мрак души, от Бога удаленной, совести терзания, скрежет
зубный, огнь неугасимый и червь неумирающий. Трепещу таковыя участи и,
якоже о самем себе, молюся о во аде страждущих, да снидет на ня росою
прохлаждения наша песнь: Аллилуиа.
Икос 6
Возсиял свет Твой, Христе Боже наш, на седящия во тьме и сени смертней
и во аде сущия, Тебе взывати не могущия. В преисподняя земли снизшед,
изведи, Господи, во отраду грехми с Тобою разлученныя, но не отрекшияся
от Тебе чада Твоя: страждут бо люте, помилуй я. Согрешиша бо на небо и
пред Тобою, безмерно тяжки грехи их, но и милость Твоя безмерна есть.
Посети горькую нищету душ, от Тебе отдаленных, помилуй, Господи, истину
по неведению гнавшия, буди им любовь Твоя не огнем палящим, но райскою
прохладою.
Господи, Любы Неизреченная, помяни усопшия рабы Твоя.
Кондак 7
Помощь подати десницею Своею тщашеся усопшим рабом Своим, живым,
Господи, таинственное вразумление подаждь, на молитву их подвизая, да,
поминая отшедшия, благая дела и милостыни за ня творят, взывая:
Аллилуиа.
Икос 7
Церковь Христова
Вселенская непрестанно молитвы за почившия по всей земли возносит,
греси бо мира пречистою Кровию Божественнаго Агнца смываются, от смерти
к животу и от земли к небеси души усопших преходят силою молитв,
возносимых за ня пред олтари Божии. Буди, Господи, ходатайство Церкви
умершим лествицею к небеси. Помилуй я, Господи, предстательством
Пресвятыя Богородицы и всех святых. Остави им согрешения, верных Твоих
ради, день и нощь к Тебе вопиющих. За молитвы святых пощади и помилуй
грешныя. Приими, Господи, молитвы наша и милостыни, яко восполнение
добродетелей их.
Господи, Любы Неизреченная, помяни усопшия рабы Твоя.
Кондак 8
Земля вся общая могила священная есть, на всяком бо месте – прах отец и
братии наших. Единый неизменно возлюбивый ны, Христе Боже наш, помилуй
вся, яже от начала и доныне умершия, да воспоют любовию безмерною:
Аллилуиа.
Икос 8
Грядет день, яко
пещь горящая, день велий и страшный Суда последняго, тайны человеческия
открыются, книги совестныя разгнутся. «Примиритеся с Богом! – вопиет
апостол Павел, – примиритеся прежде онаго страшнаго дне!» Помози нам,
Господи, слезами живых недостающее умерших восполнити. Да будет им,
Господи, звук трубы Ангельской спасения благовестием, и в час суда
Твоего радостнаго помилования их сподоби. Увенчай, Господи, славою за
Тя пострадавшия и покрый благостию Твоею прегрешения немощных. Господи,
всех по имени ведый, помяни во иночестем чине спасавшияся, помяни
благословенныя пастыри со чады их.
Господи, Любы Неизреченная, помяни усопшия рабы Твоя.
Кондак 9
Благословите скоротекущее время, каждый бо час, мгновение каждое к
вечности приближает. Новая скорбь, седина новая вестницы суть вестницы
мира грядущаго, свидетелие тленности земныя, яко вся мимотечет
возвещает, яко Царство вечное приближися, идеже несть ни слез, ни
воздыхания, но отрадное пение: Аллилуиа.
Икос 9
Яко древо по времени листвий своих лишается, тако и дние наша
оскудевают. Увядает и юности празднество, светильник радования угасает,
длизится старости отчуждение. Друзи и сродницы умирают. Где вы, юныя
ликующия? Безмолвны гроби их, но души их в деснице Твоей. Господи, Ты
еси солнце пресветлое, озари и согрей усопших селения. Да прейдет
навеки горькаго разлучения время. Сподоби ны радостнаго свидания на
небесех. Сотвори, Господи, да вси купно будем с Тобою. Возврати
Господи, отшедшим дествта чистоту и юности благодушие, и праздником
Пасхи да будет им живот вечный.
Господи, Любы Неизреченная, помяни усопшия рабы Твоя.
Кондак 10
Проливая тихия слезы на могилах сродников наших, молимся с надеждою и
со упованием взываем: «Скажи нам, Господи, яко оставил еси грехи их!»
Даждь о сем извещение таинственное сердцу нашему, да воспеваем:
Аллилуиа.
Икос 10
Весь путь
прешедшия жизни нашея обозревая, вижу множество ближних и знаемых моих
уже отшедших, и мнози их благая ми содеявшия. Любовию своею должная сим
воздавая, вопию Ти: Сподоби, Господи, славы небесная родители моя и
ближняя моя, над ложем моим младенческим бодрствовавшия, возрастившия и
воспитавшия мя. Прослави, Господи, пред Ангелы святыми, всех
благовествовавших ми слово спасения, добру и правде святым примером
жизни своея учившия мя. Услади, Господи, тех, иже во дни скорби моея
манною сокровенною усладиша мою душу. Вся благодетели моя вознагради и
спаси.
Господи, Любы Неизреченная, помяни усопшия рабы Твоя.
Кондак 11
Где твое, смерте, жало, где же и мрак и страх твой, прежде бывший?
Отныне ты, желанная, неразлучно с Богом сочетаеши, покою великий
субботства таинственнаго. Желание имам умрети и со Христом быти,
взывает апостол. Темже и мы, взирая на смерть, яко на стезю к вечней
жизни, воззовем: Аллилуиа.
Икос 11
Воскреснут мертвии и востанут сущии во гробех и возвеселятся живущии на
земли, яко востанут телеса духовныя, светло прославленныя, нетленныя.
Кости сухия, слышите слово Господне: «Се Аз введу в вас дух живота и
дам на вас жилы и возведу на вас плоть и простру по вам кожу».
Востаните от лет древних, искупленнии кровию Сына Божия, оживленнии
смертию Его, возсия бо на вы свет воскресения. Отверзи им, Господи,
ныне всю бездну совершенств Твоих. Ты сиял еси им светом солнца и луны,
да узрят они и славу лучезарных ликов ангельских. Ты услаждал еси я
великолепием востока и запада светил небесных, да узрят же они и свет
невечерний Божества Твоего.
Господи, Любы Неизреченная, помяни усопшия рабы Твоя.
Кондак 12
Плоть и кровь Царствия Божия не наследят. Доколе во плоти живем,
отлучени есмы от Христа, аще же умрем, оживем для вечности. Подобает бо
тленному телу нашему в нетление облещися и мертвенному сему безсмертием
просияти, дабы во свете невечерняго дне воспети: Аллилуиа.
Икос 12
Чаем сретения Господня на воздусе, чаем ясныя зари воскресения, чаем
пробуждения из гробов сродников наших и знаемых и оживления умерших в
сияющей лепоте жизни. Грядущее преображение всея твари торжествуем и
Возсоздателю нашему вопием: Господи, к торжеству, радости и доброте мир
создавый, нас из глубины греховныя к святости возставивый, даждь
умершим царствовати в новом бытии, да возсияют яко светила на небеси в
день славы их. Да будет им Агнец Божественный светом невечерним. Даждь,
Господи, и нам с ними Пасху нетления праздновати. Соедини умершия и
живыя в нескончаемей радости.
Господи, Любы Неизреченная, помяни усопшия рабы Твоя.
Кондак 13
О Премилосердный Отче Безначальный, всем хотяй спастися, Сына к
погибшим низпославый и Духа Животворящаго изливый! Помилуй, прости и
спаси сродныя и близкия нам усопшия и вся от века скончавшияся, и
предстательством их посети нас, да купно с ними вопием Тебе, Спасителю
Богу, победную песнь: Аллилуиа.
(Этот кондак читается трижды, затем 1-й икос и 1-й кондак.)
Молитва о упокоении усопших
Покой, Господи, душу усопшаго раба Твоего (усопшия рабы Твоея, души
усопших раб Твоих) (имярек) (поклон), и елико в житии сем яко человек
согреши (человецы согрешиша), Ты же, яко Человеколюбец Бог, прости его
(ю, их) и помилуй (поклон), вечныя муки избави (поклон), небесному
Царствию причастника (причастницу, причастники) учини (поклон), и душам
нашим полезная сотвори (поклон).
МОЛИТВА
Упокой, Господи, души усопших раб Твоих: святейших патриархов,
преосвященных митрополитов, архиепископов и епископов, во
священничестем, церковнем и монашестем чине Тебе послуживших;
создателей святаго храма сего, православных праотец, отец, братии и
сестер, зде и повсюду лежащих; вождей и воинов, за веру и отечество
живот свой положивших; верных, убиенных в междоусобной брани,
утонувших, сгоревших, мразом замерзших, растерзанных зверьми, без
покаяния внезапно скончавшихся и не успевших примирится со своими
враги; тех, о коих заповедали и просили нас молитися, о коих несть кому
молитися, и верных, погребения христианскаго лишенных – в месте светле,
в месте злачне, в месте покойне, отнюдуже отбеже болезнь, печаль и
воздыхание. И, яко благ и человеколюбец, прости вся вольная их
согрешения и невольная и избави их муки вечныя, яко несть человек, иже
жив будет и не согрешит, но Ты един еси кроме греха, правда Твоя –
правда во веки, и Ты еси един Бог милости и щедрот и человеколюбия, и
Тебе славу возсылаем, Отцу и Сыну и Святому Духу, ныне и присно и во
веки веков. Аминь.
|
